التفاصيل

عصير تاني من سلسلة ميكسات السوبيا لعصير مكة، كوني من محبي الفراولة بلبن فكنت داخل و انا متوقع حاجة كويسة، و في الحقيقة فعلا هو كويس لأي حد بيحب الفراولة لإن طعم الفراولة طاغي على طعم السوبيا، كنت أفضل تركيز السوبيا يبقى أزيد شوية بس مش مشكلة، ممكن الجانب السلبي أن طعم جوز الهند بتاع السوبيا مكانش لايق بشكل كامل مع الفراولة، و انه كان عايز ياخد وقت اكتر في الخلاط علشان الفراولة كانت بتحتاج لمضغ خصوصا في الاخر خلاصة الأمر أن العصير كويس خصوصا بالنسبة لسعره و انصح بيه بالذات محبي الفراولة

التفاصيل

رجعت النهاردة مع عصير جديد في سلسلة ميكسات السوبيا في عصير مكة و هو السوبيا بلح، كنت داخل للتجربة ديه بآمال عالية لإني من جمهور البلح باللبن و بعشق التمر باللبن بتاع مزارع دينا. نبدأ بالجانب الإيجابي و هو أن العصير طعمه كويس، رغم اني كنت شايف أن لو زاد تركيز السوبيا هيكون طعمه احسن، مشكلتي مع العصير ده هو أنه تقيل بزيادة و كان أحيانا بيحتاج مني مضغ قبل ما ابلع، غير أن استخدامهم للبلح بدل التمر المجفف مساعد على أنه يكون تقيل، الخلاصة أنه مش اسوأ عصير في الدنيا بس كان ممكن يكون احسن

التفاصيل

في سلسلة ميكسات مكة جربت النهاردة واحد من أشهر الميكسات عامة و اقدر اقول انهم قدروا المرادي يطلعوا احسن ما في الميكس ده، نسبة الجزر قصاد البرتقان كويسة جدا مفيش حاجة زيادة اوي، طعم الجزر المعسل مدي العصير نكهة حلوة من غير ما يكون مسكر زيادة، و بيتضرب في الخلاط كويس فبيطلع العصير قوامه خفيف سهل الشرب تجربة كويسة جدا بصراحة و أنصح بيها خصوصا أنه عصير طعمه جميل و صحي

التفاصيل

النهاردة جربت ميكس بين حاجتين من مفضلاتي في العصاير، الميكس كان بين الكيوي و الليمون، العصير في الاول و في الاخر طعمه عجبني بسبب أنه في حتة الروقان اللي بتيجي مع الليمون و طعم الكيوي ،بس مبدئيا الليمون طعمه كان نوعا ما زيادة عن طعم الكيوي و كنت أفضل أنه يكون نسبته أقل شوية، كنت متوقع أنه يكون في لسعة حمضية و قد كان، بما أن الاتنين عصاير acidic فكان في سنة حموضة بتيجي معاه كده، عامة مش اسوأ حاجة بس مرشحهوش برضه

التفاصيل

النهاردة بعد فترة ماجربتش فيها حاجة جديدة قررت اجرب الميكس ده، مبدئيا طعم الفراولة كان طبيعي و واضح و الزبادي كان مناسب جدا معاه، طعمه عامة كان قريب من طعم الفراولة بلبن و ده متوقع بس كان احلى يعني، قوام العصير كان كويس و مكانش معجن، عامة التجربة كانت كويسة و من احسن الحاجات اللي جربتها و العصير انصح بيه بشدة

التفاصيل

رجعت النهاردة لعصير كنت مجربه قبل كده لكن مكتبتش وقتها تقييم، عصير البلح موز بيجمع بين حاجتين بعشقهم و هو الموز باللبن و البلح باللبن، فكنت متحمس للتجربة بشدة، و العصير الحقيقة مكانش وحش و بالعكس طعمه كان حلو، لكن مشكلتي معاه هو طغيان طعم الموز على البلح بشكل كبير، البلح كان فعلا طعمه مش ظاهر غير حاجة بسيطة اوي اللي هو بشرب موز باللبن عادي مع مجرد لمحة بلح كده مش محسوسة، هو عامة كطعم اديله ٨/١٠ علشان بحب الموز باللبن جدا لكن الفكرة اللي هو ما اجيب موز باللبن عادي و ارخص، قوام العصير كان كويس جدا الحقيقة و مكانش صعب البلع

التفاصيل

النهاردة قررت اجرب حاجة مختلفة رغم اني كنت متردد شوية في الميكس ده لكنه في الحقيقة فاجئني و فاق كل توقعاتي، طعم الموز مع الرمان لايقين مع بعض بشكل رهيب، لذوعة الرمان الخفيفة و طعمه المسكر مع هدوء طعم الموز اكنهم بيكملوا بعض، غير انها تجربة فعلا طعمها مميز و مش بتتداق كل يوم ،قوام العصير جميل جدا بين التقل النسبي لقوام الموز و خفة قوام عصير الرمان فجايبة قوام في النص ولا تقيل ولا خفيف زي المياه، انصح بيه بشدة و اللي يجربه مش هيندم

التفاصيل

عصير هو ميكس ما بين اتنين من كلاسيكيات عصاير الفاكهة مبدئيا قوام العصير كان تقيل و ده كان متوقع بصراحة لإنهم لوحدهم مش بيبقوا اخف حاجة، العصير طعمه كان حلو مش وحش، بس افريدج، مفهوش اي حاجة مميزة، ممكن ارشحه بس شايف ان ممكن تجيب حاجة طعمها احسن بنفس السعر

التفاصيل

تقييم النهاردة هو للعصير المفضل ليا على الاطلاق في عصير مكة جمب الكلاسيكيات(سوبيا، خروب، الخ)، في مزيج رائع بين طعم البلوبيري و انتعاش التلج المثالي بالذات في الجو الحر، معتقدش هلاقي حاجة احسن من كده، قوام العصير كويس جدا و مايل لكونه مياه-ني، العصير ده برشحه لأي حد يسألني على احسن حاجة يجيبها من مكة

التفاصيل

هتكلم النهاردة عن التوأم للسموذي بلوبيري، برضه يتساوى معاه في كونه المفضل ليا من عصير مكة، اضافة الزبادي بتدي العصير اتجاه و طعم تاني، العصير بيجمع بين طعم البلوبيري و الزبادي بيضيف عمق و لمسة القشطة للطعم، و طبعا التلج من السموذي بيديه نفس الانتعاش خصوصا في الصيف، قوام العصير مثالي، المقارنة بينه و بين السموذي بلوبيري فرق تفضيل لطعم و اضافة الزبادي بس او حسب المزاج و الرغبة في التغيير لكنهم في الاخر شبه بعض، ارشحه بشدة